Shugaba Bola Ahmed Tinubu, ya ce gwamnatin sa ta samu gagarumin ci gaba a fannoni daban-daban cikin shekaru biyu da suka gabata, duk da ƙalu...
Shugaba Bola Ahmed Tinubu, ya ce gwamnatin sa ta samu gagarumin ci gaba a fannoni daban-daban cikin shekaru biyu da suka gabata, duk da ƙalubalen tattalin arziki da tsaro da ƙasar ta fuskanta.
A jawabin da ya gabatar yayin bikin cikar Nijeriya shekaru 65 da samun ’yancin kai, shugaban ya ce manufofi da matakan da aka ɗauka sun fara sauya akalar tattalin arzikin ƙasar.
Ƙaruwar kuɗaɗen shiga da rage bashi
Shugaba Tinubu ya bayyana cewa gwamnati ta samu ƙarin kuɗaɗen shiga daga albarkatun da ba na man fetur ba, inda a bana kaɗai aka tara fiye da Naira Tiriliyan 20. A cewar sa, adadin da ake kashewa wajen biyan bashin da ake ci ya ragu daga kusan kashi 97% zuwa kasa da 50%.
Farfaɗowar Tattalin arziki
Rahoton hukumar ƙididdiga ya nuna cewa tattalin arzikin Nijeriya ya samu ƙaruwar kashi 4.23% a zangon biyu na shekarar 2025, wanda ya zarce hasashen IMF na kashi 3.4. Haka kuma, hauhawar farashin kayayyaki ya sauka zuwa kashi 20.12% a watan Agusta, mafi ƙaranci cikin shekaru uku.
Ci gaban masana’antu da kasuwanci
Shugaban ya ce Nijeriya ta koma “net exporter”, wato tana sayar da kaya ga ƙasashen waje fiye da yadda take saya daga garesu. A cewar sa, kayayyakin da aka kera a gida Nijeriya sun karu da kashi 173%, kuma kusan rabin abin da ake fitarwa yanzu ba man fetur ba ne.
Ya ƙara da cewa samar da ɗanyen mai ya ƙaru daga ganga ƙasa da Miliyan ɗaya a rana a shekarar 2023 zuwa ganga Miliyan 1.68, yayin da a karon farko cikin shekaru 40 aka fara tace man fetur a cikin gida.
Asusun ajiyar ƙasa da darajar Naira
Shugaba Tinubu ya ce asusun ajiyar ƙasar ya ƙaru zuwa dala biliyan 42.03, mafi girma tun 2019. Ya kuma ce Naira ta farfaɗo bayan rikicewar da ta shiga a 2023–2024, inda gibin farashin gwamnati da na kasuwar bayan-fage ya ragu sosai.
Shirye-shiryen tallafi ga talakawa
Gwamnati ta raba Naira biliyan 330 ga iyalai miliyan takwas a karkashin shirye-shiryen tallafin zamantakewa. Haka kuma, matasa sama da 153,000 sun amfana da lamunin Credicorp, yayin da daruruwan dubban ɗalibai suka samu lamunin karatu ta ƙarƙashin shirin NELFUND.
Ababen more rayuwa
A bangaren gina kasa, gwamnati ta ce ta ci gaba da manyan ayyuka kamar layin dogo na Kaduna–Kano da Kano–Katsina–Maraɗi, titin Lagos–Calabar Coastal Highway, da kuma titin Sokoto–Badagry.
Tsaro
Shugaban ya ce jami’an tsaro na ci gaba da nasara a yaki da Boko Haram a Arewa maso Gabas da IPOB a Kudu maso Gabas. Ya ce zaman lafiya ya fara dawowa a wasu sassan da rikice-rikice suka daɗe suna addabawa.
Matasa da kirkire-kirkire
Tinubu ya jaddada cewa gwamnati na cigaba da zuba jari a matasa ta hanyar shirye-shiryen inganta kirkire-kirkire da fasaha, ciki har da shirin iDICE programme, wanda zai tallafa wa masu fara sana’o’i ta intanet da kere-kere.
“Lokacin sabuwar Nijeriya ya zo”
Shugaban ya ce duk da radadin da ’yan Najeriya suka fuskanta sakamakon gyare-gyaren tattalin arziki, sakamakon ya fara bayyana.
“Ina tabbatar muku da cewa lokaci ya yi da Najeriya za ta zama kasa mai dogaro da kanta, mai arziki, da alfahari da kanta,” in ji shi.
No comments