Hukumar Alhazan Jihar Kaduna Ta Nemi Maniyyata Su hanzarta Su Biya

Shugaban Hukumar kula da jin daɗin Alhazai ta jihar Kaduna, Malam Salihu S. Abubakar ya yi kira ga maniyyata aikin Hajjin bana, da sauran ma...

Shugaban Hukumar kula da jin daɗin Alhazai ta jihar Kaduna, Malam Salihu S. Abubakar ya yi kira ga maniyyata aikin Hajjin bana, da sauran masu hali kan su gaggauta yin rajista, kafin ranar da aka ƙayyade ta rufe rajistar ta bana, wato ƙarshen watan nan na Disamba. 

Kamar yadda ya ke ƙunshe a cikin wata sanarwa da mai magana da yawun Hukumar, Yunusa M. Abdullahi ya sanya wa hannu, ya ce, Malam Salihu ya yi wannan kira ne a wani taron manema labarai da ya gabatar a ofishin Hukumar da ke Kaduna a Larabar nan. 

Yunusa ya ce, Shugaban nasu ya kuma jaddada cewa ranar 31 ga wannan wata na Disamba ne ranar ƙarshe ta yin rajistar. Yana mai nuni da cewa yanzu kwanaki kaɗan suka rage. 

Ya ce, an yi bayanin cewa kowane maniyyaci zai ajiye Naira Miliyan Ɗaya da Dubu Ɗari Biyar N4.5 a asusun bankin Hukumar.

Shugaban Hukumar Alhazan ya kuma bayyana cewa dukkan wani maniyyaci, zai karɓi wata takarda daga manyan jami'an Hukumar da ke Ƙananan Hukumomin jihar 23, wacce da ita za su je banki su biya a asusun Hukumar.

‘’Muna sane da cewa cika ƙa'idojin aikin Hajji na da muhimmanci matuƙa, muna so mu tabbatar maku da cewa ƙofar yin rajista a buɗe ta ke har zuwa 31 ga watan nan na Disambar 2023.

Malam Salihu ya ƙara da cewa, wajibi ne duk kuɗaɗen da aka karɓa, a miƙa su ga Hukumar Alhazai ta ƙasa zuwa ranar 5 ga watan Janairun 2014 don cika ƙa'idojin da Hukumomin Ƙasar Saudo Arewa suka gindaya.

Daga nan ya tabbatar wa da jama'a cewa Hukumar ta kasance a shirye wajen ganin an gudanar da aikin Hajji mai cike da nasara.

Shugaban ya kuma yi alwashin cewa Kwamitin da gwamnatin jiha ta kafa, zai kawo gagarumin canji wajen inganta harkar gudanar da aikin Hajji, ta yadda maniyyaci sai ya ji a jikin sa cewa bai yi asarar kuɗin sa ba.

A nan ne Malam Salihu ya yi kira ga Limaman Juma'a, Shugabannin musulmi da 'yan jarida su taimaka wa ƙoƙarin Hukumar wajen jawo hankalin maniyyata su hanzarta biyan kuɗin, kafin wa'adin ya ƙare. 

A ƙarshe ya gode wa waɗanda suka riga suka biya, tare da yin kira ga waɗanda ba su biya, su hanzarta.