Shugaba Tinubu Ya Taya Murtala Garo Murnar Zama Mataimakin Gwamnan Kano

​Shugaba Bola Ahmed Tinubu ya taya Alhaji Murtala Sule Garo murnar rantsar da shi a matsayin sabon Mataimakin Gwamnan Jihar Kano, wanda Gwam...

​Shugaba Bola Ahmed Tinubu ya taya Alhaji Murtala Sule Garo murnar rantsar da shi a matsayin sabon Mataimakin Gwamnan Jihar Kano, wanda Gwamna Abba Kabir Yusuf ya ƙaddamar a ranar Talata.

​Gwamna Abba ya naɗa Murtala Garo ne domin cike gurbin da Comrade Aminu Abdulsalam ya bari, bayan murabus ɗin da ya yi biyo bayan sauya sheƙar gwamnan zuwa jam’iyyar APC.

​Murtala Garo, mai shekara 48, gogajen ɗan siyasa ne wanda ya riƙe muƙamai daban-daban, ciki har da ​Shugaban Ƙaramar Hukumar Kabo,​Kwamishinan Ma’aikatar Ƙananan Hukumomi da Al’amuran Masarautu a ƙarƙashin gwamnatin tsohon Gwamna Abdullahi Umar Ganduje, kuma ɗan takarar Mataimakin Gwamna na jam’iyyar APC a zaben shekarar 2023.
​
​Shugaba Tinubu ya jinjina wa Gwamna Abba Kabir Yusuf bisa wannan naɗi, yana mai bayyana cewa matakin zai ƙarfafa haɗin kan da ake buƙata a cikin sahu da jerin mambobin jam’iyyar APC a Jihar Kano.

​Haka zalika, Shugaban ya yi kira ga ɗaukacin masu ruwa da tsaki da su mara wa Gwamnan da mataimakin sa baya domin ciyar da jihar gaba. Ya kuma buƙaci sabon Mataimakin Gwamnan da ya yi aiki kafaɗa-da-kafaɗa da gwamna domin samar da shugabanci na gari da zai bunƙasa jihar.

​A karshe, Shugaba Tinubu ya yi wa Murtala Garo fatan alheri a wannan sabon nauyi da aka dora masa.