Daga IRO MAMMAN A ranar Laraba, Ministan Yaɗa Labarai da Wayar da Kai, Alhaji Mohammed Idris, ya bayyana cewa aikin sauya tsarin watsa talbi...
Daga IRO MAMMAN
A ranar Laraba, Ministan Yaɗa Labarai da Wayar da Kai, Alhaji Mohammed Idris, ya bayyana cewa aikin sauya tsarin watsa talbijin na Nijeriya daga analog zuwa dijital (Digital Switch Over — DSO), wanda aka daɗe ana jira, ya kammala shirye-shiryen sa gaba ɗaya domin fara aiwatar da shi a faɗin ƙasar nan, inda aka tsara ƙaddamar da shi a ranar 17 ga Yuni. Ministan ya yi sanarwar ne a lokacin da ya kai wata ziyara ga NIGCOMSAT a Abuja, inda ya duba kayayyaki da cibiyoyin aikin.
Cikin farin ciki, Idris ya bayyana wannan shiri a matsayin wani babban sauyi ga masana’antar watsa shirye-shirye ta Nijeriya, yana cewa: “Wannan wata sabuwar alfijir ce ga ƙasar mu.”
Ministan, tare da Darakta Janar na Hukumar Kula da Watsa Shirye-shiryen Rediyo da Talbijin ta Ƙasa (NBC), Charles Ebuebu, da Manajar Darakta/Shugabar NIGCOMSAT, Jane Egerton-Idehen, sun bayyana wasu daga cikin manyan fa’idojin tattalin arziki da zamantakewa da ake sa ran DSO ɗin zai kawo.
Shin a zahiri menene ainihin ma’anar wannan sauyi zuwa tsarin dijital, kuma ta yaya zai shafi harkar talbijin a Nijeriya?
A taƙaice, "Digital Switch Over" (DSO) wani tsarin sauya yadda ƙasa take watsa siginar talbijin ɗin ta daga tsarin analog zuwa tsarin dijital. A fahimta mai sauƙi, yana nufin maye gurbin tsohuwar hanyar watsa siginar talbijin da sabuwar fasaha mafi inganci ta zamani.
Ana sa ran wannan sauyin zai kawo muhimman canje-canje kamar haka:
1. Ingancin hoto da sauti: Talbijin na dijital yana samar da hoto mafi tsafta da sauti mafi inganci idan aka kwatanta su da tsarin analog.
2. Ƙarin tashoshin talbijin: A tsarin analog da ake da shi yanzu, mita guda yawanci tana ɗaukar tasha ɗaya ne kawai. Amma fasahar zamani ta dijital tana iya ba da damar tashoshi da dama su yi amfani da mita guda, wanda hakan zai ƙara zaɓin shirye-shiryen da masu kallo za su samu.
3. Faɗaɗa damar kallon talbijin kyauta: Ƙasashe da dama sun yi amfani da wannan sauyi wajen ƙara damar kallon talbijin kyauta ba tare da biyan kuɗin kebul ba, duk da cewa masu kallo suna iya buƙatar kayan aiki mafi dacewa.
4. Haɗuwar satalayit da dandamalin wayar hannu: Tsarin watsa shirye-shiryen dijital na zamani yana iya ba da damar kallo ta hanyar dikoda, satalayit, har ma da manhajojin wayar hannu.
5. Ingantaccen amfani da mitar sadarwa: Tsarin dijital yana amfani da mitar rediyo cikin hikima, yana ba da damar amfani da sauran sararin mitar wajen ayyukan sadarwa kamar intanet mai sauri da sadarwar wayar hannu.
6. Ingantaccen auna yawan masu kallo da hulɗa da masu amfani: Tsarin dijital yana iya samar da sahihan bayanai game da yadda mutane suke kallon shirye-shirye, tare da yiwuwar samar da wasu ayyukan hulɗa.
Me gidaje za su buƙata?
Ga yawancin masu kallo, ana buƙatar ɗaya daga cikin waɗannan:
1. Talbijin na dijital mai na’urar karɓar siginar dijital a cikin sa; ko
2. Talbijin na analog da aka haɗa da dikoda.
Me ya sa wannan sauyi yake da muhimmanci?
Sauyin Nijeriya zuwa tsarin dijital wani ɓangare ne na sauyin da ake yi a duniya baki ɗaya, wanda ke da nufin inganta watsa shirye-shirye, ƙara inganci, faɗaɗa zaɓin shirye-shirye, yin amfani da mitar sadarwa cikin hikima, da sabunta kayayyakin aikin watsa shirye-shirye.
Ga misali mai sauƙi: kamar sauyawa ne daga tsohuwar wayar salula mai ƙarancin ingancin kira zuwa babbar wayar zamani mai sautin HD mai tsafta. Aikin iri ɗaya ne, amma fasahar ta fi ƙarfi matuƙa.
Kamar yadda Minista Idris ya nuna, an shafe shekaru ana tattauna aikin DSO a Nijeriya a matsayin wani ɓangare na sauyawa daga tsarin analog zuwa tsarin talbijin na dijital ta ƙasa. Sai yanzu haƙa za ta cimma ruwa. Idan har aka aiwatar da shi yadda ya kamata, wannan sauyi yana iya sake fasalta masana’antar watsa shirye-shirye ta Nijeriya, faɗaɗa damar samun shirye-shirye, tare da buɗe sababbin damarmakin tattalin arziki a harkokin yaɗa labarai da sadarwa. Cikakken tasirin sa zai ƙara bayyana a cikin watanni da shekaru masu zuwa.
No comments