Wata majiya mai tushe daga fadar shugaban ƙasa ta bayyana cewa, Mai Ba Shugaban Ƙasa Shawara kan Tsaro (NSA), Mallam Nuhu Ribadu, bai yi mu...
Wannan ƙarin haske ya biyo bayan naɗa Manjo Janar Adeyinka A. Famadewa (mai ritaya) a matsayin Mashawarci na Musamman ga Shugaban Ƙasa kan Tsaron Cikin Gida (Homeland Security).
Majiyar ta bayyana cewa, naɗin Janar Famadewa wani bangare ne na yunƙurin Shugaba Bola Ahmed Tinubu na sake garambawul ga tsarin tsaron ƙasar nan domin fuskantar ƙalubalen tsaro.
Ga wasu muhimman hujjoji da majiyar ta bayar:
Haɗin Gwiwa: Sabon ofishin zai taya ofishin NSA aiki ne, ba wai zai maye gurbinsa ba.
Ƙwarewa: Janar Famadewa tsohon jami’i ne a ofishin NSA tsakanin 2015 zuwa 2021, don haka ya san dabarun aikin.
Ayyukan Ofishin: Sabon ofishin zai fi mayar da hankali ne kan shige da fice (Immigration), jami’an tsaro na farar hula (Civil Defence), tsaron sufuri da kuma tattara bayanan sirri na cikin gida.
Majiyar ta tabbatar da cewa Mallam Nuhu Ribadu na ci gaba da jin daɗin amincewar Shugaba Tinubu, kuma yana nan yana gudanar da ayyukansa na haɗa kan hukumomin tsaro da sarrafa bayanan sirri na ƙasa baki ɗaya.
"Jita-jitar cewa Mallam Nuhu Ribadu ya yi murabus ƙarya ce tsagwaronta, kuma kamata ya yi jama'a su yi watsi da ita domin ba ta da tushe balle makama." — Majiyar Fadar Shugaban Kasa
A ƙarshe, fadar shugaban ƙasar ta yi kira ga ’yan Nijeriya da su guji bin labaran bogi waɗanda ka iya haddasa ruɗani a cikin tsarin tsaron ƙasar nan, musamman a wannan lokaci da ake ƙoƙarin kawo ƙarshen ayyukan ta’addanci da bindiga.
No comments