TSAFTACE MUHALLI: Za A Rufe Kasuwanni Da Shaguna A Gobe Asabar Tsakanin 7-10 Na Safe

Gwamnatin Jihar Kaduna ta sanar da cewa za a gudanar da aikin Tsabtace Muhalli na wata-wata a faɗin jihar a ranar Asabar, 28 ga watan Fabrai...

Gwamnatin Jihar Kaduna ta sanar da cewa za a gudanar da aikin Tsabtace Muhalli na wata-wata a faɗin jihar a ranar Asabar, 28 ga watan Fabrairu, 2026, daga ƙarfe 7:00 na safe zuwa 10:00 na safe.

 Kwamishinan Yaɗa Labarai, Malam Ahmed Maiyaki, ya bayyana hakan a wata sanarwar manema labarai inda yace  Gwamnatin ta sake jaddada ƙudirin ta na tabbatar da dorewar muhalli, inganta lafiyar al’umma, da kuma kiyaye tsafta a dukkan sassan jihar.

 Maiyaki ya ƙara da  cewa dukkan kasuwanni, makarantu, wuraren aiki, tashoshin mota da sauran wuraren taruwar jama’a za su kasance a rufe har zuwa ƙarfe 10:00 na safe domin bai wa mazauna damar fita su tsaftace muhallansu da unguwanninsu.

Shi ma Kwamishinan Muhalli, Abubakar Buba, ya jaddada muhimmancin wannan aiki na wata-wata, yana mai cewa yana daga cikin manyan matakan kariya da gwamnati ke ɗauka domin inganta lafiyar jama’a.

Ya ce, “Aikin tsaftace muhalli na wata-wata ba kawai wani al’amari ne na yau da kullum ba; nauyi ne na haɗin gwiwa da ke da nufin kare lafiyar al’umma, hana ɓullar cututtuka, da tabbatar da tsafta da tsaro a Jihar Kaduna.”

Kwamishinan ya yi kira ga shugabannin al’umma, ƙungiyoyin ‘yan kasuwa, ƙungiyoyin direbobi da sauran mazauna da su tabbatar da cikakken bin wannan umarni a yankunansu, yana mai gargadin cewa duk wanda ya saɓa zai fuskanci hukunci daidai da dokokin muhalli da ke aiki.

Akan hakan gwamnatin Jihar Kaduna ta buƙaci al’umma da su ɗauki wannan aiki da muhimmanci, tana mai jaddada cewa tsaftar muhalli nauyi ne na kowa da kowa tsakanin gwamnati da jama’a.