Nenadi Usman Ta Fara Aiki A Ofishin jam’iyyar LP A Matsayin Shugaba

Daga Imrana Abdullahi Kwamitin riƙon ƙwarya na jam’iyyar Labour Party, wanda Sanata Nenadi Usman ke jagoranta, ya fara aiki a ofishin jam’iy...

Daga Imrana Abdullahi

Kwamitin riƙon ƙwarya na jam’iyyar Labour Party, wanda Sanata Nenadi Usman ke jagoranta, ya fara aiki a ofishin jam’iyyar na ƙasa a Abuja a ranar Talata, bayan hukuncin kotu da ya tabbatar da jagorancin ta.

Usman tare da sauran mambobin tawagarta sun isa ofishin jam’iyyar ne da misalin ƙarfe 11 na safe.

An cire manyan hotuna da tallace-tallacen tsohon shugaban jam’iyyar na ƙasa, Julius Abure, da suka mamaye harabar ofishin a baya, sannan aka maye gurbin su da manyan hotunan Sanata Usman, wanda ya nuna sauyin jagoranci a fili bayan hukuncin kotu da ya tabbatar da ita a matsayin shugaba.

Masu goyon bayan jam’iyyar da mambobi da dama sun taru a kusa da ofishin suna jira, yayin da harkokin jam’iyyar suka fara motsi a hankali. Yanayin ya kasance cikin natsuwa tare da nuna alamar jiran abin da da dama suka bayyana a matsayin muhimmin lokaci ga jam’iyyar.

Fara aikin Sanata Usman ya zo ne kwanaki bayan hukuncin kotu da ya kawo ƙarshen rikicin shugabanci da ya daɗe a jam’iyyar, wanda ya ba ta damar karɓar cikakken ragamar jagorancin jam’iyyar.