Tattaunawa a kafafen sada zumunta ta sake ɗaukar zafi bayan yaɗuwar wasu saƙonnin imel da ake dangantawa da marigayi attajirin Amurka, Jeffr...
Tattaunawa a kafafen sada zumunta ta sake ɗaukar zafi bayan yaɗuwar wasu saƙonnin imel da ake dangantawa da marigayi attajirin Amurka, Jeffrey Epstein. Epstein ya mutu a tsare a 2019 yana fuskantar tuhuma kan safarar mata don lalata, kuma rahotanni sun taɓa nuna yadda yake da alaƙa da manyan mutane a siyasa da kasuwanci.
A baya-bayan nan, wasu saƙonni da ake yadawa a intanet na zargin tattaunawa kan batutuwan binciken jikin ɗan Adam da kuma yiwuwar safarar mata daga Nijeriya zuwa wasu ƙasashe.
Cikin waɗanda ake ambata har da attajirin nan Bill Gates, sai dai babu wata hujja ta hukuma da ta tabbatar da sahihancin waɗannan zarge-zarge.
Masana harkar lafiya a Najeriya sun ce duk da rashin tabbas kan sahihancin saƙonnin, lamarin ya nuna muhimmancin tsauraran dokoki da sa ido kan duk wani binciken lafiya da ke da alaƙa da ƙasashen waje.
Hankali ya kuma karkata ga Ma’aikatar Lafiya ta Tarayya da Ministan Lafiya, Muhammad Ali Pate, inda ake kira da a ƙara bayyana hanyoyin sa ido, kare bayanan lafiyar ‘yan ƙasa, da tabbatar da cewa duk wani haɗin gwiwa na ƙasa da ƙasa yana bin dokokin Najeriya da ƙa’idojin duniya.
Ƙungiyoyin farar hula da wasu ‘yan ƙasa na buƙatar ƙarin bayani daga hukumomi domin ƙarfafa amincewa da tsarin kula da lafiya, tare da tabbatar da cewa ana kare mata da ƙananan yara daga duk wata yiwuwar cin zarafi.
Masana sun jaddada cewa neman bayani da gaskiya ba zargi ba ne, illa wata hanya ta ƙarfafa riƙon amana da inganta tsarin lafiya a ƙasa.
No comments