'Yan Sanda A Kano Sun Kama Ɗan Siyasar Da Ya Fito Da Bindiga A Bainar Jama'a

Rundunar ’Yan Sandan Jihar Kano ta kama Hon. Aminu Abdullahi Warkal domin yi masa tambayoyi kan zargin nuna wata bindiga mai ƙarfi a bainar ...

Rundunar ’Yan Sandan Jihar Kano ta kama Hon. Aminu Abdullahi Warkal domin yi masa tambayoyi kan zargin nuna wata bindiga mai ƙarfi a bainar jama’a yayin wani taron siyasa da aka gudanar a jihar.

Kakakin Rundunar ’Yan Sandan Jihar Kano, CSP Abdullahi Haruna Kiyawa, ya bayyana a cikin wata sanarwa cewa nuna makamin da ake zargin Warkal ya yi na iya zama saɓa wa tanade-tanaden Dokar Makamai.

Kiyawa ya ce a halin yanzu ana tsare da Warkal a Sashen Leken Asiri na Jiha (SID) na rundunar, yayin da ake ci gaba da gudanar da bincike kan lamarin.

An kai Warkal hedikwatar rundunar da ke Bompai, Kano, ne bayan wani bidiyo da ya yaɗu a kafafen sada zumunta, wanda aka ce yana nuna shi a bainar jama’a riƙe da wata bindiga da ake kyautata zaton bindigar harbin famfo ce (pump-action rifle) a wani taron siyasa.

Rundunar ta ce tawagar sa ido kan kafafen intanet ta gano bidiyon ne yayin da take bibiyar kafafen sada zumunta, a wani ɓangare na ayyukan leƙen asiri da rundunar ke gudanarwa domin sa ido kan harkokin tsaro a faɗin jihar.

Kakakin rundunar ya ce an gayyaci Warkal zuwa hedikwatar rundunar ne bisa umarnin Kwamishinan ’Yan Sandan Jihar Kano, CP Ibrahim Adamu Bakori.

Rundunar ta ce tana nazarin yanayin da ya kewaye zargin nuna makamin, tana mai gargadin cewa irin wannan hali na iya “janyo tsoro, razana jama’a da kuma kawo cikas ga zaman lafiya da tsaron al’umma.”

Kwamishinan ’Yan Sandan Jihar Kano, CP Bakori, ya ce rundunar ba za ta lamunci duk wani nau’in take doka, daba ko nuna makaman da ka iya yin barazana ga zaman lafiyar jama’a ba, ba tare da la’akari da matsayi ko matsayin mutanen da abin ya shafa ba.

Ya kuma umarci ’yan siyasa da sauran masu ruwa da tsaki da su gudanar da harkokinsu cikin lumana, tare da bin tanade-tanaden Dokar Zaɓe, Dokar Makamai da sauran dokokin da suka shafi irin waɗannan harkoki.

Bakori ya jaddada cewa harkokin siyasa da tarukan neman goyon baya ya kamata su kasance masu ƙarfafa zaman lafiya, haƙuri da mutunta doka.