Gwamnatin Tarayya ta umarci dukkan Ma’aikatu, Sassa da Hukumomin Gwamnati da su dakatar da tsarin tura ma’aikatan da ke shirin ritaya hutun ...
Gwamnatin Tarayya ta umarci dukkan Ma’aikatu, Sassa da Hukumomin Gwamnati da su dakatar da tsarin tura ma’aikatan da ke shirin ritaya hutun dole na watanni uku kafin ranar ritayarsu, tana mai bayyana cewa babu wani tanadi irin wannan a cikin Dokokin Aikin Gwamnati.
Wannan umarni na ƙunshe ne a cikin wata takarda da Shugabar Ma’aikatan Gwamnatin Tarayya, Didi Walson-Jack, ta fitar tare da aikewa ga manyan jami’an gwamnati da suka hada da ministoci, manyan sakatarori, shugabannin hukumomin tsaro, shugabannin hukumomi da sauran manyan masu gudanar da harkokin gwamnati.
A cikin takardar mai taken “Ingantacciyar Fassarar Dokar Aikin Gwamnati Ta 120243 Kan Shirye-shiryen Ritaya”, Walson-Jack ta bayyana cewa wasu ma’aikatu da hukumomi sun yi kuskuren fassara lokacin sanarwar ritaya a matsayin lokacin hutu, lamarin da ya sa ake cire ma’aikata daga aiki kafin wa’adin ritayarsu ya cika.
Ta ce dokar aikin gwamnati ta tanadi ne kawai cewa ma’aikacin da ke shirin ritaya ya bayar da sanarwar watanni uku kafin ranar ritayarsa, ya halarci taron horaswa ko bitar shirin ritaya na wata guda, sannan ya yi amfani da sauran lokacin wajen daidaita bayanan aikinsa da kuma takardun fansho.
A cewarta, abin da ake kira hutun dole na watanni uku kafin ritaya ba shi da wani tushe a cikin dokokin aikin gwamnati.
“Dokar 120243 ta tanadi abubuwa uku ne kawai, wato bayar da sanarwar ritaya, halartar taron shirin ritaya a cikin watan farko, da kuma kammala takardun ritaya a cikin sauran watanni biyun,” in ji ta.
Shugabar Ma’aikatan Gwamnatin Tarayyar ta jaddada cewa duk ma’aikacin da ke dab da ritaya yana ci gaba da kasancewa ma’aikacin gwamnati har zuwa ranar da ritayarsa za ta fara aiki, kuma wajibi ne ya ci gaba da gudanar da ayyukansa sai dai idan yana halartar bitar shirin ritaya ko kuma yana kan wani izinin aiki da doka ta amince da shi.
Ta kara da cewa dokar ba ta ware ma’aikatan da ke gab da ritaya daga gudanar da ayyukansu ba a lokacin sanarwar ritaya.
Saboda haka, gwamnati ta umarci dukkan ma’aikatu da hukumomi da su daina tilasta wa ma’aikatan da ke shirin ritaya barin ofisoshinsu ko dakatar da aiki kafin ranar ritayarsu ta hukuma.
A karkashin sabon tsarin, ana sa ran ma’aikatan da ke gab da ritaya za su ci gaba da gudanar da ayyukansu, su halarci shirye-shiryen da aka amince da su kan ritaya, sannan su kammala duk wani aiki da ya shafi bayanan fansho da na aikin gwamnati kafin su bar aiki.
Takardar ta kuma umarci sakatarorin dindindin, daraktoci janar, sakatarorin zartarwa, shugabannin hukumomin da doka ta kafa da kuma shugabannin cibiyoyin gwamnati da su sanar da ma’aikatansu wannan sabon umarni tare da tabbatar da cikakken bin sa.
Ana sa ran wannan sabon mataki zai shafi dubban ma’aikatan gwamnatin tarayya da ke fuskantar ritaya a kowace shekara.
Tsawon shekaru, ma’aikatu da dama suna daukar lokacin sanarwar ritaya a matsayin wani nau’in hutu, inda ake umartar ma’aikata su daina zuwa aiki da zarar sun mika sanarwar ritayarsu.
A aikace kuwa, ma’aikata da dama suna kwashe watanni uku a gida suna jiran a kammala musu shirye-shiryen ritaya da fansho.
Gwamnatin Tarayya ta bayyana cewa sabon umarnin na da nufin tabbatar da daidaitaccen aiwatar da dokokin aikin gwamnati a dukkan hukumomi, tare da hana asarar gogaggun ma’aikata kafin lokacin ritayarsu ya yi.
Jami’an gwamnati sun kuma yi imanin cewa matakin zai taimaka wajen inganta ayyukan gwamnati, domin zai bai wa ma’aikatan da ke gab da ritaya damar ci gaba da bayar da gudunmawar kwarewarsu har zuwa ranar da za su bar aiki a hukumance.
A Najeriya, dokokin aikin gwamnati da dokar gyaran tsarin fansho ne ke tsara tsarin ritayar ma’aikatan gwamnati. Dokokin sun tanadi cewa ma’aikaci zai yi ritaya idan ya kai shekara 60 da haihuwa ko kuma ya yi shekara 35 yana aiki, duk wanda ya fara cika.
A tsawon shekaru, jinkirin sarrafa takardun fansho da rashin daidaiton bayanan ma’aikata sun kasance manyan kalubale ga masu ritaya, lamarin da ya sa gwamnati ta bullo da tarukan horaswa kafin ritaya domin taimaka musu wajen fahimtar rayuwa bayan aiki da kuma yadda za su kammala takardunsu.
Sai dai sabanin fassarar dokar da wasu ma’aikatu suka yi ne ya haifar da fahimtar cewa ma’aikata suna da hakkin samun hutun dole na watanni uku kafin ritaya.
Sabuwar takardar da Shugabar Ma’aikatan Gwamnatin Tarayya ta fitar ta kawo karshen wannan rudani, inda ta tabbatar da cewa watanni ukun sanarwar ritaya lokaci ne na sanarwa da kammala shirye-shiryen gudanarwa, ba lokaci ne na hutu daga aiki kai tsaye ba.
No comments