Za Mu Ci Gaba Da Bayar Da Gudumawa Don Tabbatar Da Nasarar ADC A Kano -Ambasada Mainasa

Daga Ibrahim  Muhammad, Kano A yayin da jam'iyyar ADC ke ci gaba da samun karbuwa da samun shigowar muhimman mutane manyan jagororin siy...

Daga Ibrahim  Muhammad, Kano

A yayin da jam'iyyar ADC ke ci gaba da samun karbuwa da samun shigowar muhimman mutane manyan jagororin siyasa cikin ta daga jam'iyyu daban-daban, wani jigo a cikin jam'iyyar da ya daɗe yana bada gudumawa wajen bunƙasata a jihar Kano daga Ƙaramar Hukumar Dala, Ambasada Abdulrahman Mai Nasara Salga ya bayyana jin daɗin sa da yadda jam'iyyar ke samun karbuwa.

Ambasada Abdulrahman Salga, wanda ya yi takarar neman ɗan majalisar tarayya a Ƙaramar Hukumar Dala a 2023, ya ce abin farin ciki ne garesu irin bunƙasar da ake samu a jam'iyyar da suka jima suna ƙoƙarin ganin ta karbu ta tallata manufofin ta a tsakanin jama'a.

Ya ce, shigowar Dakta Rabiu Musa jagoran Kwankwasiyya da ɗumbin magoya bayan sa, tare da shigowar tsohon mataimakin Gwamnan Kano, Ƙwamared Aminu Abdulsalam, da dan takarar Gwamnan Kano a jam'iyyar APC a zaben 2023, Dokta Nasir Yusuf Gawuna, jam'iyyar ADC a nan Kano babban ci gaba ne da nasara ga jam'iyyar da ake ganinta ƙarama ce a baya, yanzu ta zama jam'iyyar adawa mafi ƙarfi a ƙasar nan.

Abdulrahman Mainasara ya ce su a matsayin su na yan jam'iyyar za su ci gaba da abin da suke yi na ganin al'umma sun karbe ta, suna fata jiga-jigan shugabanni da suke a jam'iyyar tun daga kan tsohon mataimakin shugaban ƙasa, Atiku Abubakar da Peter Obi da Kwankwaso da sauran jagorori za su haɗa kai, a sanya mafitar ƙasar nan a gaba domin kai wa ga nasara a zaben 2027 mai zuwa.