Wasu masu garkuwa da mutane su biyu da ake zargi da aikata fyaɗe kan wasu matan aure a lokacin da suke tsare da su, sun shiga hannun jami...
Wasu masu garkuwa da mutane su biyu da ake zargi da aikata fyaɗe kan wasu matan aure a lokacin da suke tsare da su, sun shiga hannun jami'an tsaro sakamakon wata tsararrar gadar tsare da matan suka tsara.
Yadda abin da ya faru shi ne, su dai waɗannan mata, domin tsira da rayukan su, sun nuna kamar suna ƙaunar waɗanda suka yi musu fyaɗen ne, inda suka riƙa nuna musu kulawa da kalamai masu daɗi na yaudara.
Da haka matan suka shawo kan masu garkuwan ta yadda suka yi musayar lambobin waya, bayan sun saki matan, sakamakon biyan kuɗin fansa. Bayan samun ’yanci ne sai matan suka sanar da jami’an tsaro, tare da ci gaba da mu’amala da masu garkuwan a waya, kamar babu komai da ya faru.
A wata rana, matan sun gayyaci mutanen biyu zuwa wani wurin haɗuwa, suna nuna kamar haɗuwar soyayya ce. Sai dai ba tare da sanin masu laifin ba, jami’an ’yan sanda sun riga sun shirya musu tarko.
Da isar masu garkuwan wurin haɗuwar, jami’an tsaro suka yi nasarar cafke su ba tare da wata hatsaniya ba. A halin yanzu, ana ci gaba da gudanar da bincike, inda hukumomi suka ce za a gurfanar da su gaban kotu domin fuskantar hukunci bisa laifukan da ake zargin su da aikatawa.
Daga nan Hukumomin tsaron sun yaba da jarumtar matan, tare da yin kira ga al’umma da su riƙa kai rahoton duk wani laifi ga jami’an tsaro domin kare lafiyar jama’a.
No comments