Sojoji Sun Kashe Mutum Uku Yayin Zanga-zanga A Yobe

Mutane uku ne suka mutu yayin da wasu da ba a tantance adadinsu ba suka samu raunuka bayan da wata motar sintiri ta sojojin Nijeriya ta buge...

Mutane uku ne suka mutu yayin da wasu da ba a tantance adadinsu ba suka samu raunuka bayan da wata motar sintiri ta sojojin Nijeriya ta buge wani mai adaidaita sahu, lamarin da ya yi sanadin jikkata direban da fasinjojinsa.

Wani ganau mai suna Adamu Hassan ya shaida wa manema labarai cewa lamarin ya faru ne da yammacin ranar Lahadi a babbar kasuwar Garin Alkali ta Gashua, hedikwatar ƙaramar hukumar Bade ta jihar.

“Bayan faruwar lamarin ne ƙungiyar ’yan adaidai sahu suka gudanar da zanga-zanga a wasu wuraren da suka tare babban titin zuwa Gashua, hedikwatar ƙaramar hukumar Bade.

“Jami’an sojojin da suka fusata sun dawo suka fara harbi ba ƙaƙƙautawa, abin takaici wasu masu zanga-zangar sun ji rauni kuma daga baya aka kwashe su zuwa Asibitin kwararru, Gashua domin kula da lafiyarsu,” inji shi.

Wata majiya daga Asibitin Kwararru Gashua ta ce an shigo da waɗanda suka jikkata da dama ciki har da gawarwaki a asibitin, amma ba a iya tantance adadinsu ba.