Ba Zan Lamunci Ayyukan Cin Hanci Da Rashawa A Gwamnati Na Ba - Gwamna Lawal

Gwamna Dauda Lawal na jihar Zamfara ya bayyana cewa gwamnatin sa ba za ta amince da duk wani nau'i na cin hanci da rashawa ko rashin tau...

Gwamna Dauda Lawal na jihar Zamfara ya bayyana cewa gwamnatin sa ba za ta amince da duk wani nau'i na cin hanci da rashawa ko rashin tausayin al'umma daga mambobin majalisar sa ko ma'aikatan gwamnati a Jihar ba.

A ranar Alhamis ne gwamnan ya jagoranci zaman Majalisar Zartarwa na musamman a zauren majalisar a gidan gwamnati da ke Gusau.

A wata sanarwa da mai magana da yawun gwamnan, Sulaiman Bala Idris, ya fitar ta ce majalisar ta kasance taron zartarwa na farko na gwamnatin Zamfara a shekarar 2024.

Ya ƙara da cewa, Gwamna Dauda Lawal ya buƙaci dukkan masu riƙe da manyan muƙamai da kwamishinoni da masu ba da shawara na musamman da su fahimci manufar sa tare da saita ayyukan su.

Sanarwar gwamnan ta ce: Zuwa ga Kwamishinoninmu, Shugabannin Hukumomi da Ma'aikatunmu, ku ne Manyan Jami'an Gudanarwa a cikin gwamnati. An naɗa ku don samar da jagoranci na gari ne, ba don bayar da kwangila ko raba kayan aiki don cigaban kan ku ba.

“Ku ba ’yan kwangila ba ne; ku masu hidimta wa mutane ne. Dole ne ku cire tunanin cewa an naɗa ku don yin wani abu ban da hidima da inganta rayuwa ɗimbin jama'a ta hanyar samar da kayan aiki da ababen more rayuwa da za su tallafa wa rayuwarsu da ayyukansu ba.

“Dole ne mu kawo canjin da ake buƙata domin ciyar da jihar gaba; dole ne mu yi abubuwa iri daban.

“Ba mutanen jihar nan sun zaɓe mu ne don kawai mu maye gurbin fuskoki da halayen waɗanda suka gabace mu ba. An zaɓe mu ne don mu canja yadda ake gudanar da harkokin gwamnati.”

Gwamnan ya ƙara nanata wa majalisar cewa ba ya shiga cikin gwamnati ne don neman kuɗi ba.

“Game da haka, ina gaya muku wannan a yau: Ba zan yarda da duk wani aiki na cin hanci da rashawa da rashin tausayi daga kowane mai riƙe da muƙami ko ma’aikacin gwamnati ba. Na sha cewa ban zo nan don neman kuɗi ba, kuma duk wanda ke da burin arzuta kansa gara ya canja shawara ko kuma ya yi murabus daga gwamnati cikin mutunci.