Tsofaffin Abokan Siyasar El-Rufai Sun Koma APC, Sun Ce Shi Ne Ya Ci Amanar Su

Tsoffin abokan siyasa da magoya bayan tsohon Gwamnan Jihar Kaduna, Nasir El-Rufai, sun yi watsi da zargin cewa sun ci amanarsa, suna cewa a ...

Tsoffin abokan siyasa da magoya bayan tsohon Gwamnan Jihar Kaduna, Nasir El-Rufai, sun yi watsi da zargin cewa sun ci amanarsa, suna cewa a maimakon haka, shi ne ya yi watsi da fahimtar siyasar da ta haɗa su tun farko.

Matsayar ƙungiyar, wacce tsohon Mataimakin Shugaban Majalisar Dokokin Jihar Kaduna, Mukhtar Isah Hazo, da wasu abokan siyasar suka sanya wa hannu, an raba wa ’yan jarida a Kaduna ranar Alhamis.

’Yan siyasar, ƙarƙashin ƙungiyar Kaduna De-Initiative, sun ce sun taɓa mara wa El-Rufai baya, yi masa kamfen tare da kare shi a siyasance, yayin da suke taimakawa wajen gina tsarin siyasa a faɗin jihar.

Sai dai sun ce dangantakar ta fara samun matsala ne sakamakon zargin ware wasu daga cikin abokan siyasar, saɓanin ra’ayi da kuma raguwar amincewar juna.

Ƙungiyar ta kuma sanar da komawarta jam’iyyar All Progressives Congress (APC), bayan wani yunƙurin sulhu da Gwamnan Jihar Kaduna, Uba Sani, ya jagoranta.

Ta ce matakin na komawa APC ya samo asali ne daga buƙatar su ɗauki alhakin makomar siyasarsu da ta magoya bayansu.

Daga cikin waɗanda suka sanya hannu ko suke da alaƙa da matsayar akwai tsohon Shugaban Jam’iyyar Social Democratic Party (SDP) na Jihar Kaduna, kuma tsohon ɗan Majalisar Dokokin jihar na Ungwan Sanusi sau huɗu, Nasiru Abdullahi Maikano.

Sauran sun haɗa da tsoffin kwamishinoni Ja’afaru Sani, Shehu Usman Makarfi da Abdu Kwari, da kuma tsohon Kwamishinan Harkokin Ƙananan Hukumomi da Kuɗi, Bashir Saidu, wanda ya taɓa zama Babban Ma’aikacin Ofishin Gwamna (Chief of Staff) ga El-Rufai sau biyu.

Ƙungiyar ta ƙaryata bayanin da ke cewa mambobinta ’yan siyasa ne da suka fusata kuma ke neman hanyar dawo da martabarsu a siyasa.

Ta ce, “Ba wasu ’yan siyasa ne kawai da suka fusata kuma ke neman hanyar samun matsayi a siyasa ba.

“Mambobinmu sun taɓa tsayawa takara, wasu sun ci zaɓe wasu kuma sun sha kaye. Sun tattara al’umma tare da gina alaƙar siyasa a dukkan ƙananan hukumomi 23 na Jihar Kaduna.”

Ƙungiyar ta ƙara da cewa ba ita ce ta yi watsi da El-Rufai ba, sai dai tana ganin tsohon gwamnan ne ya yi watsi da fahimtar siyasar da ta ɗaure su tare.

“Ba mu yi watsi da El-Rufai ba; a maimakon haka, muna ganin El-Rufai ne ya yi watsi da fahimtar siyasar da ta haɗa mu,” in ji sanarwar.

Tsoffin abokan siyasar sun ce saɓanin da ya shiga tsakaninsu da El-Rufai ya fara bayyana sosai ne a wa’adinsa na biyu a matsayin gwamnan Kaduna, musamman bayan sake zaɓensa a 2019.

Sun yi zargin cewa wasu daga cikin abokan siyasar tsohon gwamnan sun fara jin an mayar da su gefe wajen yanke muhimman shawarwarin gwamnati.

Haka kuma, sun zargi wasu daga cikin ’yan gidan El-Rufai da fara samun ƙarin tasiri a harkokin gudanar da gwamnati.

“Ba mu taɓa ƙorafin cewa El-Rufai ya dogara da ’yan gidansa ko wasu amintattun mutanensa ba. Abin da ya dame mu shi ne yadda tasirin muradun iyali ya fara ƙaruwa, yayin da tsarin siyasar da ya tallafa wa gwamnatin ya fara yin rauni,” in ji su.

A cewar ƙungiyar, dangantakar ta riga ta tsananta sosai zuwa shekarar 2023, sannan ta ƙara lalacewa bayan El-Rufai ya bar kujerar gwamna.

Ta ce batun siyasar zaɓen gwamnan Kaduna na 2027 a ƙarƙashin jam’iyyar African Democratic Congress (ADC) shi ne ya kawo ƙarshen alaƙar siyasar da ke tsakaninsu.

Ƙungiyar ta ce tsohon Kwamishina Ja’afaru Sani shi ne ɗan siyasar da ɓangaren nasu ya fi son ya gaje su a takarar gwamna, kuma shi ne wanda aka tsara za a gina tsarin siyasar su a kansa domin zaɓen 2027.

“Ja’afaru Sani shi ne mutumin da ake sa ran tsarin siyasarmu zai tattaru a kansa domin takarar gwamna a 2027,” in ji sanarwar.

Sai dai ƙungiyar ta yi zargin cewa El-Rufai ya zaɓi mara wa tsohon abokin hamayyarsa a siyasa, Isa Ashiru, baya a zaɓen fidda gwani na ADC.

“Maimakon ya goyi bayan tsarin siyasar da muka gina, El-Rufai ya zaɓi mara wa Isa Ashiru baya, wanda a baya ya kasance abokin hamayyarsa na siyasa,” in ji ƙungiyar.

Daga baya Ashiru ya lashe zaɓen fidda gwani na ADC da ƙuri’u 86,113, yayin da Ja’afaru Sani ya samu ƙuri’u 29,580.

Sai dai Sani ya ƙi amincewa da sakamakon, yana zargin an samu kura-kurai da rashin bin ƙa’ida a lokacin zaɓen.

Tsoffin abokan siyasar El-Rufai sun kuma yi zargin cewa goyon bayan da ya bai wa Ashiru yana da alaƙa da yunƙurin ci gaba da riƙe tasirinsa a siyasa idan har ADC ta kafa gwamnati a Kaduna.

Sun kuma yi wani zargi cewa an yi wata fahimta ta siyasa da za a naɗa wasu daga cikin matan El-Rufai guda biyu mukamai a gwamnati idan ADC ta lashe zaɓen.

Sai dai ƙungiyar ta amince cewa ba a tabbatar da wannan zargi a gaban wata kotu ba, kuma babu wata yarjejeniya a rubuce da aka gabatar wa jama’a da za ta tabbatar da shi.

A nasu ra’ayin, tsoffin abokan siyasar sun ce bai kamata a ɗauki biyayya ga ɗan siyasa a matsayin wani bashi na dindindin da dole sai an biya shi ba.

Sun ce El-Rufai yana da ’yancin yin zaɓin siyasar da ya ga dama, kamar yadda su ma suke da ’yancin yin nasu zaɓin.

“Ba za a ɗauki biyayyar siyasa a matsayin wani bashi na dindindin ba. El-Rufai yana da ’yancin yin zaɓin siyasarsa, mu ma muna da ’yancin yin namu,” in ji su.

Haka kuma, sun yi watsi da ra’ayin cewa El-Rufai shi kaɗai ne ya gina tsarin siyasar da ya kai shi ga samun nasarar zaɓe a Kaduna.

“Ba El-Rufai ne ya ƙirƙiri siyasar Kaduna daga farko ba. Akwai ’yan siyasa, masu shirya harkokin siyasa a matakin ƙasa, tsoffin zaɓaɓɓun jami’ai da kuma tsare-tsaren siyasa da aka riga aka kafa tun kafin El-Rufai ya zama babban jigo a siyasar jihar,” in ji ƙungiyar.

Ta kawo Bashir Saidu a matsayin ɗaya daga cikin mutanen da suka taka rawa wajen gina wannan tsarin siyasa tun kafin fitowar El-Rufai a matsayin babban ɗan siyasar Kaduna.

Daga baya Saidu ya zama kwamishina a gwamnatin El-Rufai sannan ya riƙe matsayin Babban Ma’aikacin Ofishin Gwamna sau biyu.

Ƙungiyar ta ce sabon sauyin matsayinta na siyasa ya samo asali ne daga buƙatar sake tsara makomarta tare da mutanen da suke goyon bayanta, musamman bayan abubuwan da suka faru a shekarun baya.