Rundunar ’Yan Sandan Jihar Sakkwato ta ce jami’anta sun fatattaki wasu da ake zargin ’yan bindiga ne da suka kai hari ƙauyen Tsabre da ke ƙa...
Rundunar ’Yan Sandan Jihar Sakkwato ta ce jami’anta sun fatattaki wasu da ake zargin ’yan bindiga ne da suka kai hari ƙauyen Tsabre da ke ƙaramar hukumar Isa, inda suka tilasta musu tserewa tare da kwato wasu makamai da suka bari a baya.
Rundunar ta ce harin ya faru ne da misalin ƙarfe 1:00 na dare ranar Juma’a, kamar yadda Kakakin Rundunar ’Yan Sandan Jihar Sokoto, Ahmad Rufa’i, ya bayyana a cikin wata sanarwa.
A cewar Rufa’i, ɗumbin ’yan bindigar ɗauke da makamai sun shiga cikin al’ummar garin tare da fara harbe-harbe, lamarin da ya jefa mazauna yankin cikin firgici.
Ya ce bayan samun kiran neman agaji, Jami’in ’Yan Sandan Yankin Isa (DPO) ya tattara jami’an rundunar da ke aikin dabara, ciki har da Sashen Yaƙi da Garkuwa da Mutane da Sashen Tunkarar Manyan Laifuka Masu Tashin Hankali, domin dakile harin.
Rufa’i ya ce jami’an tsaron sun yi artabu da maharan, lamarin da ya tilasta wa ’yan bindigar ja da baya zuwa wani daji da ke kusa da yankin.
Sai dai kakakin rundunar bai bayyana ko an kashe wani daga cikin maharan ko kuma adadin waɗanda suka samu raunuka ba.
Haka kuma, sanarwar rundunar ba ta bayyana ko wani daga cikin mazauna garin ko jami’an tsaro ya mutu ko ya samu rauni yayin harin ba.
Bayan da maharan suka tsere, jami’an tsaro sun gudanar da bincike a kewayen yankin, inda suka gano wasu makamai da kayan amfani da aka bari a baya.
Rundunar ta ce daga cikin abubuwan da aka gano akwai na’urorin harba rokoki guda biyu, tare da magazinan bindigar AK-47 guda biyu da babu harsasai a ciki.
Sauran kayayyakin da jami’an suka kwato sun haɗa da wayar Tecno mai maɓallan dannawa wadda ba ta da batir, fitila, hular sojoji irin ta jeji, hular sanyi, takalman roba guda biyar da kuma rigar kariya daga ruwan sama.
Rundunar ’Yan Sandan ba ta sanar da kama wani mutum da ake zargi da hannu a harin ba. Haka kuma, ba ta bayyana irin na’urorin harba rokoki biyun da aka gano ba, ko kuma yanayinsu.
Kwamishinan ’Yan Sandan Jihar Sokoto, Hayatu Shaffa, ya yaba wa jami’an da suka shiga aikin fatattakar maharan, tare da yabawa ƙoƙarinsu na dakile harin.
Kwamishinan ya kuma buƙaci mazauna jihar da su kasance cikin taka-tsantsan tare da sanar da jami’an tsaro duk wani abu ko motsi da suke zargin ba shi da kyau.
Ya kuma yi kira ga jama’a da su gaggauta sanar da hukumomin tsaro idan suka ga wasu mutane da ake zargin sun samu raunukan harbin bindiga suna neman magani a asibitoci ko wasu cibiyoyin kiwon lafiya.
No comments