Yadda Aka Kama Manyan Kwamandojin Boko Haram Bakwai A Hanyar Su Ta Dawowa Daga Aikin Hajji

Ministan Harkokin Cikin Gida na Nijeriya, Dakta Olubunmi Tunji-Ojo, ya bayyana cewa jami’an tsaro sun kama wasu mutane bakwai da ake zargin ...

Ministan Harkokin Cikin Gida na Nijeriya, Dakta Olubunmi Tunji-Ojo, ya bayyana cewa jami’an tsaro sun kama wasu mutane bakwai da ake zargin manyan kwamandojin ƙungiyoyin Boko Haram da ISWAP ne yayin da suke dawowa daga aikin Hajji.

A cewarsa, an cafke waɗanda ake zargin ne a filin jirgin saman Katsina a ranar Alhamis bayan sun iso daga Makka, kafin daga bisani a miƙa su ga Hukumar Tsaro ta Farin Kaya (DSS) domin ci gaba da bincike. Ya ce nasarar wannan aiki ta samu ne sakamakon inganta tsarin tantance bayanan jama'a da kuma haɗa bayanan hukumomin gwamnati wuri guda.

Tunji-Ojo ya bayyana hakan ne a ranar Juma’a a Fadar Shugaban Ƙasa da ke Abuja bayan Shugaba Bola Ahmed Tinubu ya rattaba hannu kan sabuwar Dokar Hukumar Kula da Shaidar Ɗan Ƙasa ta Ƙasa (NIMC) ta shekarar 2026.

A wajen taron sanya hannu kan dokar akwai Shugaban Majalisar Dattawa, Godswill Akpabio; Mataimakin Kakakin Majalisar Wakilai, Benjamin Kalu; Jagoran Majalisar Wakilai, Julius Ihonvbere; Babban Lauyan Tarayya kuma Ministan Shari’a, Yarima Lateef Fagbemi; wakilin Bankin Duniya, Taimur Samad; da Darakta Janar ta Hukumar NIMC, Dakta Abisoye Coker-Odusote.

A cikin wata sanarwa da Mai Bai Wa Shugaban Ƙasa Shawara kan Yaɗa Labarai da Dabaru, Bayo Onanuga, ya fitar, gwamnatin tarayya ta bayyana sabuwar dokar a matsayin wani muhimmin mataki na zamanantar da tsarin tantance bayanan jama’a, ƙarfafa tsaro, inganta samar da ayyukan gwamnati da kuma bunƙasa tattalin arzikin dijital na ƙasa.

Da yake jawabi bayan rattaba hannu kan dokar, Ministan Harkokin Cikin Gida ya ce wannan doka za ta taimaka matuƙa wajen ƙarfafa tsaron cikin gida da kuma sauƙaƙa wa ‘yan ƙasa samun ayyukan gwamnati.

Ya bayyana cewa gwamnatin Shugaba Tinubu ta gaji wani tsarin bayanan jama’a da ya rarrabu, inda mahimman bayanai ke aiki ba tare da alaƙa da juna ba. Sai dai ya ce yanzu an samu haɗin kai tsakanin manyan cibiyoyin bayanan gwamnati.

“Lokacin da wannan gwamnati ta hau mulki, tsarin bayananmu ya kasance a rarrabe. Samun fasfo da lasisin tuƙi ba su da alaƙa da bayanan NIMC. Amma yanzu ba za ka iya samun fasfon Nijeriya ba sai an tantance bayananka daga NIMC,” in ji shi.

Tunji-Ojo ya ƙara da cewa haɗa bayanan hukumomi ya taimaka wajen ƙarfafa kula da iyakokin ƙasa da kuma tattara bayanan sirri na tsaro.

Ya tuna cewa a baya wasu manyan jami’ai sun nuna damuwa kan yadda wasu ‘yan ta’adda suka samu damar zuwa aikin Hajji. Sai dai ya ce sabon tsarin da aka kafa ya taimaka wajen gano waɗanda ake nema.

“Makon da ya gabata ne aka kama wasu mutum bakwai da ake da bayanan cewa kwamandojin Boko Haram da ISWAP ne yayin da suke dawowa daga Makka ta filin jirgin saman Katsina. Daga nan aka miƙa su ga DSS,” in ji ministan.

Ya bayyana cewa wannan nasara ta samu ne saboda haɗa bayanan NIMC da na Hukumar Shige da Fice ta Nijeriya, tare da tsarin sadarwa kai tsaye da Hukumar ‘Yan Sandan Duniya (Interpol) ke yi da hukumomin Nijeriya.

Ministan ya ce sabuwar dokar za ta taimaka wajen ƙara ingancin lambar shaidar ɗan ƙasa ta NIN, ƙarfafa haɗin gwiwar hukumomi, da kuma yaƙi da satar bayanan jama’a, ta’addanci, laifukan kuɗi da sauran barazanar tsaro.

A nasa jawabin, Shugaban Majalisar Dattawa, Godswill Akpabio, ya yaba da amincewar Shugaban Ƙasa da dokar, yana mai cewa hakan ya nuna aniyar Majalisar Tarayya wajen samar da dokokin da suka dace da ƙalubalen tsaro da ci gaban ƙasa.

Shi ma Mataimakin Kakakin Majalisar Wakilai, Benjamin Kalu, ya bayyana dokar a matsayin wani babban sauyi da zai inganta shugabanci, gaskiya da riƙon amana tare da taimakawa ci gaban ƙasa ta hanyar ingantaccen tsarin tantance bayanan jama’a.

A nata ɓangaren, Darakta Janar ta NIMC, Dakta Abisoye Coker-Odusote, ta tabbatar da cewa hukumar za ta yi aiki tare da sauran hukumomi, abokan hulɗar ci gaba da kamfanoni masu zaman kansu domin tabbatar da aiwatar da dokar yadda ya kamata.

Ta ce dokar ta samar da sabon tsarin doka na zamani ga tsarin bayanan dijital na Nijeriya, tare da ƙarfafa matsayin lambar NIN a matsayin babbar hanyar tantance shaidar ɗan ƙasa da samun ayyukan gwamnati da na masu zaman kansu.