Sheikh Dahiru Usman Bauchi Ya Kwanta Dama

Fitaccen malamin addinin Musulunci, Sheikh Dahiru Usman Bauchi, ya rasu bayan ya shafe dogon lokaci yana fama da jinya. Wani makusancin iyal...

Fitaccen malamin addinin Musulunci, Sheikh Dahiru Usman Bauchi, ya rasu bayan ya shafe dogon lokaci yana fama da jinya.

Wani makusancin iyalansa ya tabbatar da rasuwar ga manema labarai, ya bayyana mutuwar a matsayin babbar rashi ga al’ummar Musulmi da kuma ƙasa baki ɗaya.

Majiyar ta ce, rasuwarsa ta girgiza mabiyansa da ɗalibansa a sassan Nijeriya da ƙasashen waje, yana mai jaddada cewa marigayin ya shafe rayuwarsa yana hidimar ilimin addini, tarbiyya da kuma wa’azi na zaman lafiya da daidaito.

Har zuwa lokacin haɗa wannan rahoto, iyalansa ba su sanar da cikakken lokacin jana’iza ba, sai dai ana sa ran za su fitar da sanarwa nan ba da jimawa ba domin sanar da jama’a lokutan jana’iza da sauran al’amuran da suka dace.

Sheikh Dahiru Usman Bauchi na daga cikin manyan malaman da suka yi tasiri sosai a harkar da’awa da koyar da addinin Musulunci a Nijeriya tsawon shekaru da dama, inda dubban ɗalibai suka ci gajiyar karatunsa da koyarwarsa. 

Mutuwarsa ta haifar da saƙonnin jaje daga bangarori daban-daban na al’umma.