Su Waye Sababbin Hafsoshin Rundunonin Sojin Nijeriya?

Nijeriya ta shiga sabon babi a tsarin tsaron ƙasa bayan naɗa sabbin hafsoshin rundunonin soji da suka fito daga sahun gogaggun jami’ai masu ...

Nijeriya ta shiga sabon babi a tsarin tsaron ƙasa bayan naɗa sabbin hafsoshin rundunonin soji da suka fito daga sahun gogaggun jami’ai masu ƙwarewa a yaƙi, ilimi da jagoranci. Sabbin hafsoshin – waɗanda suka haɗa da manyan kwamandoji daga rundunar sojoji, jiragen sama, da na ruwa – na daga cikin manyan jami’an da suka fi kwarewa da samun horo a cikin gida da ƙasashen waje.

Waɗannan hafsoshin sun shafe shekaru da dama a filin fama, aikin tsaro, da jagorantar rundunoni a Najeriya da ma ƙasashen Afirka, inda suka taka muhimmiyar rawa a yaƙin da ake yi da ta’addanci, zaman lafiya, da ƙarfafa tsarin tsaro na ƙasa.

Babban Hafsan Sojin Ƙasa – Manjo Janar Waidi Shaibu

An haifi Manjo Janar Waidi Shaibu a ranar 18 ga Disamba, 1971, a Ƙaramar Hukumar Olamaboro ta Jihar Kogi. Ya shiga makarantar soja ta Najeriya (NDA) a shekarar 1989 a matsayin ɗan ajin 41 kuma aka ɗora masa rawanin Laftanar na biyu a shekarar 1994 a rundunar sojojin bindigogi masu sulke (Armour Corps).

Janar Shaibu yana daga cikin jami’an da suka fi zurfin ilimi a sojojin ƙasa. Ya samu digiri a fannin Injiniya daga NDA Kaduna, sannan ya yi karatun digiri na biyu a fannin Gudanar da Harkokin Jama’a (University of Calabar), da karatun dabarun tsaro da dabarun jagoranci daga jami’o’in Ibadan da National Defence University, Washington D.C., Amurka. Haka kuma ya halarci horo a Harvard Kennedy School da cibiyoyin soja a Ghana, Kenya da Najeriya.

A filin fama, ya taka rawa a Operation Zaman Lafiya, Lafiya Dole, Tura Takaibango, Hadin Kai, da kuma ayyukan wanzar da zaman lafiya na Majalisar Ɗinkin Duniya a Sudan da Liberia. Ya rike mukamai da dama, ciki har da kwamandan 21 Armoured Brigade Bama, kwamandan runduna ta 7 (Division 7), kuma yanzu shi ne Daraktan Bincike da Ci gaban Makamai a Heritage and Future Centre.

An karrama shi da Distinguished Service Star (DSS), Field Command Medal (FCM), da Purple Heart Medal saboda bajintarsa a yaƙin da ta’addanci.


Babban Hafsan Sojin Ruwa – Rear Admiral Idi Abbas

Rear Admiral Idi Abbas, dan asalin Jihar Kano, an haife shi a ranar 20 ga Satumba, 1969. Ya shiga NDA a ajin 40 kuma aka naɗa shi jami’i a shekarar 1992.

Ya yi aiki a wurare daban-daban, ciki har da Flag Officer Commanding Central Naval Command, Bayelsa, inda ya samu nasara wajen rage fashi a teku da satar mai. Yana daga cikin jami’an da ke taka muhimmiyar rawa wajen tsare-tsaren haɗin gwiwar tsaro a Nigerian Army Heritage and Future Centre.

Rear Admiral Abbas mutum ne mai nutsuwa da ƙwarewa a tsare-tsaren dabaru, kuma yana da aure da ‘ya’ya.


Babban Hafsan Sojin Sama – Air Vice Marshal Sunday Kelvin Aneke

An haifi AVM Aneke a ranar 20 ga Fabrairu, 1972, a Makurdi, Jihar Benue, daga asalin ƙaramar hukumar Udi ta Jihar Enugu. Ya shiga NDA a ajin 40 kuma aka ɗora masa rawanin jami’i a rundunar sojin sama a 1993.

Yana da digiri a Physics, digiri na biyu a Diplomacy, da kuma karatu a Aviation Safety Management daga Embry-Riddle University a Amurka. Haka kuma ya halarci US Air War College.

A fagen tashi da jiragen soja, yana da fiye da awanni 4,300 na tashi a jiragen Gulfstream V, Falcon 900, Hawker 4000 da sauransu. Ya taba zama kwamandan 307 Executive Airlift Group, sannan mataimakin kwamandan Nigerian Defence Academy.


Babban Hafsan Leƙen Asiri – Manjo Janar Emmanuel Akomaye Undiandeye

An haife shi a Bedia, ƙaramar hukumar Obudu ta Jihar Cross River, a ranar 2 ga Satumba, 1968. Ya yi karatu a NDA Kaduna da Royal Military Academy Sandhurst a Birtaniya.

Ya taka rawa a ayyukan zaman lafiya na Majalisar Ɗinkin Duniya a Liberia da Abyei, kuma ƙwararre ne a fannin bincike da tsare-tsaren leƙen asiri. Yana memba na National Defence University (Washington DC) da Nigerian Army Resource Centre.


Babban Hafsan Tsaro – Laftanar Janar Olufemi Olatubosun Oluyede

An haifi Laftanar Janar Oluyede a ranar 21 ga Yuni, 1968, a Ikere-Ekiti. Jagora ne mai zurfin ilimi da gogewa a yaƙin da ta’addanci da kuma ayyukan haɗin gwiwar tsaro tsakanin rundunoni.

Ya fara aiki a matsayin hafsan sojin ƙasa kafin ya zama Babban Hafsan Soji (COAS) a 2024, sannan daga baya aka ɗaga shi zuwa Babban Hafsan Tsaro (CDS).

Salon jagorancinsa ya ta’allaka ne da ƙarfafa kwarin guiwar sojoji, gyaran tsarin runduna, da habbaka haɗin kai tsakanin jami’an tsaro.


Kammalawa

Sabbin hafsoshin sun fito daga sahun jami’an da suka fi samun horo a duniya, tare da gogewa a yaƙin da ta’addanci, ayyukan wanzar da zaman lafiya, da dabarun tsare-tsare na tsaro.

Nadinsu yana nuna sabon salo na gyaran tsaro, haɗa kai tsakanin rundunoni, da ƙarfafa nagartar aikin soja a Najeriya, wanda ake sa ran zai taimaka wajen tsare rayuka da dukiyoyin ‘yan ƙasa.