Dangote Ya Zama Mutumin Afrika Na Farko Da Ya Mallaki Dalar Amurka Biliyan 30

Attajirin Afirka, Alhaji Aliko Dangote, ya kafa sabon tarihi bayan ƙididdigar Bloomberg Billionaires Index ta nuna cewa dukiyarsa ta kai Dal...

Attajirin Afirka, Alhaji Aliko Dangote, ya kafa sabon tarihi bayan ƙididdigar Bloomberg Billionaires Index ta nuna cewa dukiyarsa ta kai Dala Biliyan 30.2, wanda ya fi kowanne mutum a nahiyar Afirka.

Rahoton ya nuna cewa Dangote ya ƙara dala biliyan 2.25 cikin shekara guda — ƙaruwa da kashi 8% — sakamakon ribar da ya samu daga harkokin siminti, man fetur, da takin zamani.

Bloomberg ta bayyana cewa dukiyarsa ta ƙaru da dala miliyan 89.2 cikin sa’o’i 24 kacal, lamarin da ya tabbatar da matsayin sa a matsayin mutum na 75 mafi arziki a duniya.

A matakin duniya, Dangote ya shiga jerin manyan attajirai irin su Gina Rinehart, Eyal Ofer, da Hasso Plattner, waɗanda dukkaninsu ke da dukiya kusan daidai da ta sa.

Dangote ya fi samun riba ne daga kamfaninsa Dangote Cement Plc, ci gaban ma’adinan man Dangote Refinery, da kuma babbar jarin sa a masana’antu daban-daban a sassan Afirka.

Masana tattalin arziki sun danganta tashin darajar dukiyarsa da fara aiki a hankali na matatar man Dangote Refinery mai sarrafa ganga 650,000 a rana — wacce ita ce mafi girma a nahiyar.

Dangote na da kashi 92.3% cikin wannan ma’adinan mai mai darajar dala biliyan 20, wanda shi ne babban ginshiƙin karuwar dukiyarsa.

Haka kuma yana da kashi 86% a kamfanin Dangote Cement Plc, wanda ke da murabus a kasashe 10 na Afirka ciki har da Najeriya, Ghana, Senegal da Habasha, inda ke ci gaba da samun riba sakamakon ayyukan gina ababen more rayuwa.

Bayan harkar siminti da mai, Dangote na da masana’antar takin zamani mai iya samar da ton miliyan 2.8 a shekara, tare da hannun jari a Dangote Sugar Refinery Plc, NASCON Allied Industries Plc, da United Bank for Africa (UBA).

Har ila yau, yana da jarin gine-gine da kadarori a birnin Lagos, ciki har da gidaje da wuraren kasuwanci guda shida, waɗanda aka kimanta darajarsu ta hanyar kididdigar haya daga CBRE Broll Nigeria.

Sabon matakin da Dangote ya kai ya ƙara fito da sunayen Najeriya da Afirka a taswirar arzikin duniya, yana kuma ƙarfafa hujjar cewa masu zaman kansu a nahiyar na iya taka rawa mai muhimmanci wajen habaka tattalin arziki.