Ƙungiyar Ƙwadago Ta Jihar Kano Ta Yi Alƙawarin Ci Gaba Da Ba Gwamna Abba Kabir Goyon Baya

Daga Ibrahim Muhammad, Kano Kungiyar Kwadago ta kasa reshen  jihar Kano ta bayyana cewa zata cigaba  da goyon bayan  Gwamnan jihar Kano Inji...

Daga Ibrahim Muhammad, Kano

Kungiyar Kwadago ta kasa reshen  jihar Kano ta bayyana cewa zata cigaba  da goyon bayan  Gwamnan jihar Kano Injiniya  Abba Kabir Yusuf akan irin ayyuka  da yake na kyautatawa kyawawan manufofiin da yake aiwatarwa  ma'aikata da al'ummar Kano baki daya.

Shugaban Kungiyar reshen jihar Kano Kwamared Kabiru Inuwa ne ya bayyana goyon bayan ma’aikatan  ga Gwamna Abba Kabir Yusuf a yayin  bikin ranar ma’aikata ta duniya na 2025.

An dai  gudanar da bikin ranar ma’aikata ta Duniya ne a filin wasa na Sani Abacha da ke kofar mata  a ranar Alhamis, 1 ga Mayu, 2025.

Kwamared Kabiru Inuwa ya yi nuni da cewa, Gwamna Abba Kabir Yusuf ya kafa tarihi a matsayin shi ne  Gwamna na farko a faɗin  ƙasar  nan da ya  soma  aiwatar da sabon tsarin  mafi ƙarancin albashi na N71,000

Ya bayyana hakan da cewa jaruntace da Gwamnan  ya cancanci  a yaba masa, domin ya  taimaka wajen rage wa ma’aikata raɗaɗin halin ƙuncin rayuwa da matsin tattalin arzikin da suke ciki.

Shugaban ƙungiyar na  jihar Kano Kwamared Kabiru Inuwa ya ƙara da cewa, sannan Gwamnan ya zo ya yi ƙarin mafi ƙarancin fansho daga N5,000 zuwa  N20, 000 da kuma biyan kuɗaɗen  garatuti da ake bi bashi a Gwamnatocin baya, wannan mataki ne da ke nuna kulawar Gwamnan  ga tsofaffin ma’aikata

Shugaban ya tabo ayyuka da dama da Gwamna Abba Kabir Yusuf ke aiwatarwa domin bunƙasa ci gaban al'ummar jihar Kano da  kuma ma'aikata a ɓangarorin ilimi da lafiya da sauran fannonin.

Daga nan Kwamared Kabiru Inuwa ya ce ma'aikatan jihar Kano a shirye suke su ci gaba da bai wa Gwamnatin jihar Kano ƙarƙashin jagorancin Injiniya Abba Kabir Yusuf haɗin kai da goyon baya akan kyawawan manufofinsa na ciyar da jihar gaba