Gwamnan Jihar Zamfara, Dauda Lawal ya buƙaci ma’aikatar ilimi da hukumomin da shugabannin makarantu su mayar da hankali wajen kula da kayay...
Gwamnan Jihar Zamfara, Dauda Lawal ya buƙaci ma’aikatar ilimi da hukumomin da shugabannin makarantu su mayar da hankali wajen kula da kayayyakin da aka gyara na dukkannin makarantun gwamnati.
A ranar Larabar da ta gabata ne gwamnan ya ƙaddamar da gyararrar makarantar Gwamnatin ’Yan Mata ta Larabci (GGAS) a babban birnin jihar, Gusau.
A wata sanarwa da mai magana da yawun gwamnan, Sulaiman Bala Idris, ya fitar, ya ce an gyara wasu muhimman gine-gine a makarantar tare da gyara wasu gine-ginen da suka haɗa da rukunin gudanarwa guda biyu, rukuni guda huɗu na ajujuwa takwas, ofisoshi takwas, kicin ɗin ɗalibai, ajujuwa 20 na Racca, wurin cin abinci, da kuma wata lambu ta makaranta.
Sanarwar ta ƙara da cewa, gine-ginen da aka gyara sun haɗa da ɗakunan gwaje-gwaje, cibiyar kwamfuta ta ICT, shaguna, ɗakin karatu, masallaci, banɗakunan ɗalibai 14, banɗakunan ma'aikata huɗu, gine-ginen ɗalibai mai hawa hudu, gidan mai kula da ɗalibai, ƙofar shiga wurin ɗakunan ɗalibai, da ƙofar wurin mai gadi.
A nasa jawabin, gwamna Lawal ya sake jaddada cewa gyaran makarantun shaida na daga cikin nasarorin da aka samu wajen gudanar da ayyukan gwamnatin sa bayan ayyana dokar ta-baci a fannin ilimi.
Ya ce, “Kamar yadda muka sani, wannan makaranta tana ɗaya daga cikin tsofaffin makarantu a wannan yanki na ƙasar nan, inda ake horar da ɗaliban da za su zama malamai, a yau mun gyara makarantar ta zama babbar makarantar sakandare da ke bayar da darussan kimiyya, fasaha, kwamfuta da kasuwanci.
“Saboda gurbacewar muhalli da kuma gobarar da ta lalata wasu sassan ɗakunan kwanan ɗalibai, an kasa cimma manufar kafa makarantar.
“Saboda haka, a ci gaba da gudanar da ayyukan gwamnatinmu na inganta harkar ilimi a kowane mataki, mun ga ya zama wajibi a gyara makarantar tare da sauya fasalin makarantar ta yadda za ta ci gaba da aikinta da aka kafa ta a kai.
“An fara bayar da kwangilar ne a watan Janairun 2024 ga wani kamfani na cikin gida domin gyara rukunin gidajen ɗalibai biyar da suka ƙone gaba ɗaya sakamakon wata gobara.
“Bayan sake gina ɗakunan kwanan ɗalibai guda biyar da suka ƙone gaba ɗaya, mun tabbatar da cewa akwai buƙatar gyara makarantar, kuma an tsawaita kwantiragin da ya shafi sauran gine-gine.
“Bugu da ƙari kuma, an gudanar da aikin gyaran ne a cikin kwangilar watanni 13, tare da dukkan ayyukan injiniyoyi da na lantarki a duk faɗin makarantar, kashi na 1 da na 2 na kwangilolin sun cika ɗari bisa ɗari.
Gwamna Lawal ya kuma ce, wannan makaranta da aka gyara da kuma gyare-gyaren da ake yi a makarantun kwana daban-daban a faɗin jihar ya nuna irin ƙudirinsa na dawo da cibiyoyin ilimi kan ganiyar su.
No comments