SABON TSARI: Ba Sai Ɗaliban Arts Sun Yi Lissafi Ba Kafin Shiga Jami’a – Gwamnatin Tarayya

Gwamnatin Tarayya ta sanar da cewa daga yanzu, ɗaliban da ke neman shiga jami’o’i da kwalejojin fasaha (polytechnic) a fannin Arts da Humani...

Gwamnatin Tarayya ta sanar da cewa daga yanzu, ɗaliban da ke neman shiga jami’o’i da kwalejojin fasaha (polytechnic) a fannin Arts da Humanities ba lallai ba ne su sami lissafi a matsayin ɗaya daga cikin darussan da ake buƙata domin samun karɓa.

Wannan sabon tsari wanda Ma’aikatar Ilimi ta Ƙasa ta bayyana a ranar Talata, ya shafi sakamakon jarrabawar WAEC da NECO na kammala sakandare.

Tun shekaru da dama, ɗaliban da ke neman shiga jami’a a kowane fanni – ko fasaha, kimiyya ko zamantakewa – ana buƙatar su sami ƙididdiga (Mathematics) da Turanci (English) a matsayin wajibi. Amma yanzu, sabon tsarin ya kawo sauyi domin cire cikas da ake fuskanta wajen karɓar ɗalibai, tare da ci gaba da tabbatar da ingancin karatu.

A cewar sanarwar da mai magana da yawun Ma’aikatar, Folasade Boriowo, ta fitar, sabon “National Guidelines for Entry Requirements into Nigerian Tertiary Institutions” ya fayyace takamaiman darussan da ake buƙata a matakai daban-daban na karatun gaba da sakandare.

Ga yadda tsarin ya ke:

Jami’o’i: Ɗalibi zai sami aƙalla ƙididdigar darussa biyar (credit) a darussa masu dacewa, ciki har da Turanci, ba fiye da zama biyu ba. Lissafi wajibi ne kawai ga fannonin Kimiyya, Fasaha da Zamantakewa (Social Sciences).

Kwalejojin Fasaha (Polytechnic – ND): Ana buƙatar ƙididdigar darussa huɗu (credit) da suka haɗa da Turanci ga waɗanda ba na kimiyya ba, yayin da lissafi ke wajibi ga fannonin da suka shafi kimiyya.

Kwalejojin Fasaha (HND): Ana buƙatar ƙididdigar darussa biyar da suka haɗa da Turanci da Lissafi.

Kwalejojin Ilimi (NCE): Ana buƙatar ƙididdigar darussa huɗu da suka dace, inda Turanci ya zama wajibi ga Arts da Social Sciences, yayin da Lissafi ke wajibi ga fannonin Kimiyya, Sana’a da Fasahar Hannu.

A cewar Ma’aikatar, wannan mataki yana da nufin ba da dama ga ɗaliban fasaha da ɗan adam su sami sauƙin shiga manyan makarantu ba tare da tsangwama ta lissafi ba, musamman ga waɗanda fannonin karatunsu ba su da alaƙa kai tsaye da ƙididdiga.