RIKICIN APC A ZAMFARA: Magoya Bayan Wamban Shinkafi Sun Maida Wa Sakataren Yaɗa Martani

Daga Hussaini Yero, Gusau Ga dukkan alamu rikicin cikin gida yana ƙara ruruwa a jam'iyyar hamayya ta APC a jihar Zamfara, inda Magoya ba...

Daga Hussaini Yero, Gusau

Ga dukkan alamu rikicin cikin gida yana ƙara ruruwa a jam'iyyar hamayya ta APC a jihar Zamfara, inda Magoya bayan Wamban Shinkafi, Hon. Yushau Abdullahi Mada suka mayar da wani zazzafan martani ga Sakatare yaɗa labarai na Jihar a jihar, Yusif Idris.

Da yake magana da manema labarai a Gusau, shugaban bangaren jam'iyyar na Wamban Shinkafi, Hon. Abdullahi Yusha'u Mada ya bayyana yadda tafiyar Dr Sani Abdullahi Shinkafi ta goyi bayan ci gaban APC da jihar Zamfara.

Ya ce, "jam'iyyar Dimokraɗiyya ta Wamban Shinkafi ta ci karo da wani rubutu cike da labarai na ƙarya, batanci da cin mutunci da aka yi wa shugaban ta na siyasa, Dr Sani Abdullahi Shinkafi, duk a ƙoƙarin a faranta wa Ministan Tsaro na Jihar, Bello Matawalle rai, da kuma nuna wa jama'a cewa akwai 'yan jam'iyyar masu goyon baya da marasa goyon baya a cikin jam'iyyar APC a Jihar Zamfara.

"Bari mu tunatar da ku cewa shugaban mu kuma jarumin APC, Sani Abdullahi Shinkafi yana gida yana shirin yaƙin neman zaben sa na gwamna a ƙarƙashin tsarin APGA a 2019 lokacin da Bello Matawalle, tare da marigayi Ibrahim Mallaha, Sanata Sahabi Yau, Hon. Kabiru Amadu Mai Palace, mataimakin gwamna Mahdi Aliyu Gusau da kuma babban mai yaƙin neman zaben Mattawale, Marigayi Jamilu Aliyu Zannan Gusau suka ziyarci gidan sa, sun nemi goyon bayan sa don haɗa ƙarfi da ƙarfe wajen yaƙar gwamnatin da ke mulki a wancan lokacin.

"Da yake mutum ne mai tawali'u da son haɗin kai,  Shinkafi ya amince da buƙatar su bisa fahimtar cewa duk wanda ya yi nasara a zaɓen 2019 zai yi aiki tare da sauran don ci gaban Jihar Zamfara.

"Bayan zaɓen, da farko an ayyana APC a matsayin wacce ya yi nasara, Sani Abdullahi Shinkafi ya je kotun zaɓe, yana ƙalubalantar sakamakon bisa dalilan rashin bin ƙa'idojin zaɓe. Daga baya, Kwamishinan shari'a na wancan lokacin kuma Babban Lauyan Zarumi zai iya shaida hakan tare da babban ɗan siyasar mu Janar Ali Gusau (mai ritaya), ya roƙi Shinkafi da ya janye ƙarar sa daga kotun ƙorafin zaɓe idan ya ƙi janye ƙarar sa, sakamakon hukuncin kotun zaɓe ba zai yi wa Bello Matawalle daɗi ba."

Ya ci gaba da bayyana cewa, "A farkon gwamnatin Matawalle, Shinkafi shi ne abokin sa na ƙud da ƙud, kusan dukkan manyan manufofi da nasarorin da Matawalle ya samu a cikin kwanaki 100 na farko a ofis sun dogara ne akan shawarwari da jagorancin Shinkafi da nufin sake gina Jihar Zamfara.

"Duk da haka, a kan wannan batu, Matawalle ya fara karkacewa yana tafiyar da gwamnati zuwa ga hanyar da ba ta dace ba. Lokacin da Sani Abdullahi Shinkafi ya lura da hakan, ya ba shi shawara kai tsaye da gaskiya. Amma maimakon ingantawa, abubuwa sun tabarbare. Ganin yadda mutane ke girmama shi (Shinkafi) kuma suna girmama gaskiyarsa, ya ci gaba da amfani da kowace hanya ta halal don gaya wa Matawalle gaskiya.

"Yana da mahimmanci a lura cewa Wamban Shinkafi bai taɓa zama ƙarƙashin Matawalle ba. Su abokan siyasa ne waɗanda suka yi aiki tare don samun nasara da ci gaba.

"Saboda haka, muna kira ga waɗanda ake kira "shugabannin amintatu" na APC a Jihar Zamfara da su ji tsoron Allah su daina ɗaukar gefe, suna kare wani ɗan jam'iyya yayin da suke zagin wani.

 "A gare ku, shugabannin APC masu kishi  ku sani cewa taron jam'iyyar na sake tsara shugabanci yana gabatowa, kuma yana iya faruwa cewa wasu daga cikinku za a maye gurbinsu. Wataƙila shi ya sa kuke ƙoƙarin samun tagomashi da fa'ida daga gare shi."

Da ya juya kan Sakataren yaɗa labaran jam'iyyar kuwa, Hon. Mada cewa ya yi, "Dangane da Sakatare yaɗa labarai Alhaji Yusif Idris kuwa, muna so ya sani cewa, aikin sa a Jam'iyya shi ne yada manifofin Jamiyyar da watsa hadafita, ba rarraba kan 'yan Jamiyya ba.

"Kuma muna mai tabbatar maku cewa, kowane bangare a Zamfara ya yi gwamna, in ban da yanki Ƙauran Namoda, daga Jamiyyar APC. Don haka muke son a ba mu damar wannan karo mu ma mu yi Takarar. Wannnan muna sheda wa 'yan Jamiyya ne cewa a zabe mai zuwa na 2027 Wamban Shinkafi zai fito takarar gwamna kuma da yarda Allah muke da nasara.