2027: Mainasara Salga Ya Lashe Tikitin ADC Na Majalisar Tarayya Daga Kano

Daga Ibrahim Muhammad, Kano Hon. Abdurrahman Mansur Mainasara Salga ne ya lashe zaben fitar da gwani na jam’iyyar African Democratic Congres...

Daga Ibrahim Muhammad, Kano

Hon. Abdurrahman Mansur Mainasara Salga ne ya lashe zaben fitar da gwani na jam’iyyar African Democratic Congress (ADC) domin tsayawa takar majalisar tarayya a Ƙaramar Hukumar Dala ta jihar Kano, bayan ya samu ƙuri’u 8,973.

Zaben wanda aka gudanar a ranar 21 ga Mayu, 2026, ya gudana bisa tsarin ƙato bayan ƙato ƙarƙashin jagorancin dokar Hukumar Zabe Mai Zaman Kanta ta Ƙasa (INEC). 'Yan takara uku ne suka fafata: Hon. Abdurrahman Mansur Mainasara Salga, Hon. Nasir Isa, da Hon. Bashir Muhammad.

A ƙarƙashin kulawar wakilan uwar jam’iyyar ta ƙasa, ƙungiyoyin sa-ido da jami’an tsaro, maza da mata mambobin ADC a Dala sun fito domin kaɗa ƙuri’ar su cikin kwanciyar hankali.

Bayan kammala zaben, kwamitin gudanarwa ya bayyana sakamakon haka: Hon. Nasir Isa ya samu kuri’u 821, Hon. Bashir Muhammad ya samu kuri’u 1,584, yayin da Hon. Amb. Abdurrahman Mansur Mainasara Salga ya zama na ɗaya da ƙuri’u 8,973 daga cikin jimillar ƙuri’u 11,377 da aka kaɗa.

Dangane da haka, an tabbatar da Mainasara Salga a matsayin dan takar ADC na majalisar tarayya mai wakiltar Dala a zaben 2027.

Da yake jawabii kan nasarar da ya samu Hon. Mainasara Salga ya nuna godiyar sa ga mambobin jam’iyyar a Dala bisa goyon bayan da suka ba shi. Ya kuma buƙaci sauran yan takara da ya fafata da su da su hada kai domin ƙarfafa jam’iyyar ADC domin cimma nasara a zaben 2027.